Дорога в совершенство

У суботу, 12 верасьня, прайшоў першы семінар курса «IT-прадпрымальніцтва». У актавай залі 2-га корпуса БДУІР сабралося ля 500 чалавек, нягледзячы на святочны дзень. Сярод іх былі і студэнты, і выкладчыкі, але, што самае важнае, –  прадпрымальнікі.

На сцэне сядзелі трое спікераў. Адзін з іх – Андрэй Могін – госць з Пецярбургу, спецыяліст у галіне інвестыцый у it-праекты. Андрэй нагадаў слухачам, што асноўная мэта курса – атрымаць веды і рэалізаваць іх на прыкладзе свайго старт-апа

Цікава, што да арганізатараў паступіла ля 100 заявак ад прадпрымальнікаў з кароткім апісаннем сваіх праектаў. «Беларусь – прадпрымальніцткая краіна!» – кажа адзін з арганізатараў, кіраўнік Інкубатара бізнэс-праектаў Аляксандр Мялешчанка.

У залі ад вялікай колькасці людзей было душна, але слухачы стойка трымаліся і чакалі, вядомага ўсім у байнэце, заснавальніка інфармацыйнага парталу tut.by –  Юрыя Зісера.

Юрый Анатольевіч ужо не першы год выкладае ў БДУІР, а пра яго веды ў інтэрнэт-прадпрымальніцтве кажа вопыт. Менавіта расповеды пра свой вопыт больш за ўсё зацікавілі слухачоў. І на семінары сыпаліся пытанні пра шлях да поспеху tut.by. Падчас інтарактыву Зісер прапаноўваў залі адгадаць гісторыі поспеху сусветных праектаў у інтэрнэце.

Усіх карысных парадаў ад Зісера не пералічыць. Але будзе магчымасць паглядзець відэа-версію выступу, якая хутка з'явіцца ў інтэрнэце. Адну параду – прачытаць кнігу Фрэдэрыка Брукса «Міфічны чалавека-месяц, ці Як ствараюцца праграмныя сістэмы» – ужо актыўна выконваюць слухачы. У Твітэры нават вядзецца запіс на папяровую версію кнігі.

Першы семінар быў ўводны. Задача, што стаяла перад арганізатарамі ды дакладчыкамі, – пазнаёміць слухачоў з тым, чаму яны змогуць навучыцца падчас заняткаў. На жаль, не ўсе змогуць патрапіць на наступны семінар, бо пакой здольны ўмясціць толькі 180 чалавек. Перавага будзе аддадзена перадусім аўтарам праектаў, а таксама прадпрымальнікам, якія ёсць мэтавая аўдыторыя курса. Але тыя, хто не патрапяць на заняткі, змогуць паглядзець відэа-версію семінара.

Слухачоў наперадзе чакаюць 10 розных выкладчыкаў, семінары і практыкумы, але самае важнае адбудзецца ў снежні, калі прыйдзецца прадстаўляць свае ідэі перад інвестарамі. Вось тады байнэт папоўніцца новымі праектамі, а краіна атрымае новых прадпрымальнікаў.

Пакуль жа прапануем сачыць за нашымі абнаўленнямі на сайце, блозе, Твітары. Не забывайце: наш афіцыйны тэг – itc09.

Дзякуем нашым патрнёрам, а асабліва кампаніі Intetics, парталу it-job.by, інфармацыйнаму парталу tut.by і ўсім слухачам. Да сустрэчы праз суботу!

Дзякуй за фота Юліі Міхалюк.

Вам это будет интересно!

Последние новости